Um mannleg samskipti:

Í mannlegum samskiptum er eitt af því erfiðasta að ljúka deilum.  Á meðan á deilum stendur er margt sagt í reyði og ótta, orð sem hafa sært og verða ekki tekin til baka.  Orð get verið beittara sverð en margur heldur.
Það að sættast, kallar á vilja til að sættast, viðurkenna hlut annarra og slá af ýtrustu kröfum. Sættir taka oft langan tíma, tíminn þarf að vinna sitt verk.
Án þess að nokkur fræði liggi þar á bakvið, held ég að við íslendingar, eigum afar erfitt að setja niður deilur okkar.  Í okkur eru einhver gen ósættis og skorts á umburðarlyndi.  Fámenni og einangrun gæti hér komið við sögu.
Okkur finnst óþarfi að biðjast fyrirgefningar og stöndum á okkar fram í rauðan dauðann.  Fyrirgefning er aðeins fyrir heybrækur og aumingja.  Séu líkur á því að sú fyrirgefning komist á spjöld sönnunar, er hún útilokuð.
Gagnrýni er illa tekið, og það er dauður maður sem ekki skilur, að þöggun lifir góðu lífi á Íslandi.  Valdið og þöggunin fara hönd í hönd.
Ósætti og neikvæðni er hér gert að umræðuefni, vegna þess að það leggur sína lamandi hönd á allt.  Umræðan er ekki kláruð. Fréttir snúast 80% um eitthvað neikvætt, neikvæðni er einfaldlega fréttnæm.
Þess sjást greinileg merki að ráðamenn skynji þetta. Þannig fannst mér það umræðan nú í upphafi Alþingis vera áberandi tilraun til að lyfta andanum,  úr lágkúru neikvæðninnar.  Eðlileg gagnrýnu er af hinu góða, en það er vandi að gagnrýna og vera uppbyggilegur um leið.  Eitt af því sem uppalendur þekkja vel.

Athugasemdir

[Gunnar Rögnvaldsson, 4.10.2013 kl. 00:56]

Takk fyrir ágæta færslu 

Þetta, kæri Jón Atli, er líklega góður "galli" að hafa, því þegar að stjórnmálum kemur þá höfum við með þrjá póla að gera:

1) Hinn pólitíski hluti hagkerfisins; sem sumstaðar er kominn yfir 50 prósent af öllu hagkerfinu; þ.e. embættis- og stjórnmálamenn sem lifa á því að skammta sér sjálfir laun og eyða verðmætum í viðleitni sinni til að búa til það sem þeir sjálfir kalla og skilgreina sem "velferð" - og sem aðeins lítið eitt á skylt við hugtakið "velmegun" - og sem er á góðri leið með að enda sem eins konar allsherjar dópsala stjórnmálamanna handa kjósendum þeirra. Þegar allir eru komnir á þann kassa stjórnmálamanna, þá er lýðræðið dautt. Steindautt.

2) Hinn einkarekni hluti hagkerfisins; kapítalistarnir sem skapa verðmætin og þá velmegun sem ofangreindur hluti númer eitt lifir á að taka til sín og dreifa út til hægri, en þó ávallt mest til vinstri.

3) Lista- menntamanna og menningarhluti hagkerfisins; sem á að vera hin krítíski hluti hagkerfisins, ásamt hinum andlega hluta þess og sem skapaði bjargið sem allt ofangreint stendur á.

Þegar þessir þrír hlutar hagkerfisins - þessi þvera þrenna-  verður sammála, þá þýðir það aðeins eitt; að í gangi sé eitt allsherjar samsæri gegn kjósendum. Heilög skylda þessarar þrennu er að vera alltaf ósammála. Annað er margsannað samsæri gegn kjósendum. Og svoleiðis samsæri enda alltaf illa og skila engu nema einræði, kommúnisma og drepandi sósíalisma.

Þegar þessi þrenna gegnir hlutverkum sínum rétt, þá fáum við það besta. Lýðræðislegan kapítalisma að hætti engilsaxneskra manna.

Kveðjur

[Jón Atli Kristjánsson, 5.10.2013 kl. 16:50]

Sæll Gunnar og þakka þér sjálfum fyrir þína góðu pistla, sem alltaf eru studdir rökum.  Þú leggur í þetta mikla vinnu sem er til fyrirmyndar. Það er alveg rétt sem þú segir um hina krítísku skyldur andans manna, sjónarmið sem ég hef ekki velt fyrir mér lengi. Spurning hvort bitið í þessari gagnrýni hafi slaknað, þar sem margir í þessum hópi eru á mála hjá hópi 1) og verða að passa sig !!

Stærð 1) og þróun er ótrúleg og ég var með í eldri pistli töflu yfir þessa þróun.  Þessi geiri hefur komið ár sinni vel fyrir borð.

[Gunnar Rögnvaldsson, 5.10.2013 kl. 23:21]

Já Jón Atli, ég er sannfærður um að þú hafir rétt fyrir þér hve þetta varðar.

Svo mætti einnig bæta því hér við að Ríkisútvarpið hefur sprengt sig út úr 3ja hluta þessarar þrennu og er orðið að ríki í ríkinu sem enginn kemur böndum yfir. Þetta á ekki að líðast og þetta krefst þess að við megum aldrei lyppast niður fyrir áróðrinum um að í stjórnmálum berir fyrir alla muni að forðast það sem sumir kalla óréttilega, sem "átakastjórnmál".

Hvet þig svo hér með til að halda áfram skrifum þínum og þakka fyrir kaffið og góðar kveðjur