Umhverfi þitt.

Flestu fólki er annt um umhverfi sitt.  Götuna sína, hverfið sitt, bæinn sinn - borgina sína.

Skipulagsmál og breytingar á þeim geta haft mikil áhrif á þetta umhverfi.  Stóra breyting sveitarstjórnarmála s.l. ár er sú að íbúarnir taka miklu virkari þátt í þessum málum en áður var.

Skal líka engan undra að fólk hrökkvi  við ef það á að leggja hraðbraut í gegnum hverfið þitt, tuttugu hæða turn er í byggingu við hliðina á húsinu þínu og halda má áfram með svona ýkta upptalningu.

Þrátt fyrir að lagaumhverfi þessara mála hafi verið bætt og ekki sé lengur hægt að valta yfir fólk, kemur oft til harðvítugra deilna um umhverfis- og skipulagsmál. Íbúarnir fylgjast hinsvegar betur með en áður var, og þeir hafa fundið að þeir hafa vald, eru ekki aðeins leiksoppur yfirvaldanna.

Eitt er skipulag nýrra hverfa og almennt yfirbragð bæja og borgar. Málið vandast , þegar um er að ræða húsið á næstu lóð við þig, eða breytingar á gamla gróna hverfinu þínu.  Hvernig verður fundið eitthvert jafnvægi milli eðlilegra breytinga og þeirrar íhaldssemi sem býr í okkur öllum.  Þessi spurning er nú að koma upp á borðið af fullum þunga, þar sem gömul hverfi eru nú óðum að komast á þann aldur að á þessi mál reyni.

Einhvern vegin kemur upp í hugann, deilur íbúa og bæjaryfirvalda um stækkun húss ÁTVR á Akureyri.  Getur þessi einokunarstarfsemi ekki verið hvar sem er í bænum ?

Vandinn einfaldast ekki við það að fjárfestar hafa keypt upp gömul hús og jafnvel heilu hverfin og knýja nú dyra hjá skipulagsyfirvöldum.  Þurfa meira byggingamagn til að borga herkostnaðinn.

Þessi vakning íbúanna fyrir umhverfi sínu eru af hinu góða. Skipulagsyfirvaldið á hverjum staða þarf að vanda öll sín vinnubrögð, tími einstefnu og valdhroka er liðinn.

Athugasemdir

[Sigurður Þorsteinsson, 19.6.2011 kl. 09:21]

Jón það er sannarlega mikilvægt að almenningur taki þátt. Við þurfum hins vegar einnig að hugsa að það er hluti almennings sem tekur þátt í skipulagsmálum af hreinum eiginhagsmunaástæðum en leyfa sér að taka afstöðu án þess að skoða hagsmuni heildarinnar.

[Geir Agnar Guðsteinsson, 22.6.2011 kl. 01:24]

Jón Atli, það verða allir svo afskaplega umhverfislega sinnaðir þegar veðrið batnar. Þá taka allir til í kringum sig og verða svo afskaplega meinfýsnir ef nágranninn er á annari hillu. Við þurfum hins vegar að gæta okkar að því hvað er að gerast á Stjórnlagaþinginu. Þar velta menn vöngum yfir mannréttindum en minna yfir skyldum þínum sem þjóðfélagsþegn. Góð ríkisstjórn á að gæta þess að mannréttindi séu virt (Ögmundur í innanríkisráðuneytinu) en því miður eigum við ekki góða ríkisstjórn sem stendur. En kannski fengjum við ekkert betra, eða hvað?