Þrætubókarlist - þjóðaríþrótt um aldir.

60% kosningabærra manna sagði nei við Icesave  s.l. laugardag. Það var alveg klárt hvað stóð á kjörseðlinum.

Lög nr. 13/2011 kveða á um heimild til handa fjármálaráðherra til að staðfesta samninga, sem áritaðir voru í London 8. desember 2010, um ábyrgð á endurgreiðslu Tryggingarsjóðs innstæðueigenda og fjárfesta til breska og hollenska ríkisins á kostnaði af greiðslu lágmarkstryggingar til innstæðueigenda í útibúum Landsbanka Íslands hf. í Bretlandi og Hollandi og greiðslu eftirstöðva og vaxta af þeim skuldbindingum.

Lögin voru samþykkt á Alþingi hinn 16. febrúar 2011 en forseti Íslands synjaði þeim staðfestingar.

Eiga lög nr. 13/2011 að halda gildi?

Svarkostirnir eru:

• Já, þau eiga að halda gildi.

• Nei, þau eiga að falla úr gildi.

Nú bregður hinsvegar svo við að ótal skoðanir eru á lofti um neiið, hvað það þýðir og hvað nei - sinnar meintu með neiinu.

Er hér komið að þjóðaríþrótt okkar um aldir, þrætubókarlist og málaferlum.  Tökum nokkur dæmi:

• Nei hjá mér þýddi að ég vil ekkert borga, ( fjármálaheimurinn getur átt sig )
• Nei hjá mér þýddi að ég hafnaði ríkisábyrgð, eins og hér að ofan,
• Nei þýddi hjá mér að ég hafna ríkisábyrgð, en mun borga, enda alveg mögulegt að ég þurfi ekkert að borga,
• Nei hjá mér þýddi að ég vil fá dómstóla til að skera út um lögmæti kröfunnar, hvort ég borga eða ekki kemur í ljós,
• Nei hjá mér þýddi að ég vil óhæfa ríkisstjórn og stjórnmálmenn burt,
• Nei hjá mér þýddi ....

Neiið var í reynd svo óljós skilaboð að ráðamenn og ráðgjafar þeirra urðu að setjast niður og skipuleggja í flýti hvað átti að segja viðsemjendum okkar og heiminum.  Eins og svo oft áður misskildu erlendir fjölmiðar, það sem sagt var um  niðurstöðuna. Mikilvægt var að leiðrétta þennan misskilning.

Ef við vitum varla sjálf hvað felst í neiinu er öðrum vorkunn.  Forsetinn kom einnig að túlkuninni. „ við hefðum lýðræðislegan rétt til að hafna því að greiða þessa kröfu „  Verðmæt rök fyrir skuldara sem krafinn er um greiðslu skuldar.  Ég hef lýðræðislegan rétt......

Mér sýnist í dag neiið þýða:

• Við höfnuðum ríkisábyrgð, á endurgreiðslu,
• Við ætlum að borga, þrotabú Landsbankans mun greiða það sem það getur. Það sem útaf kann að standa, ósvíst hvort það verður greitt af okkur,
• Við erum ekki hrædd við hótanir, gamalla nýlenduþjóða, um að komast ekki í ESB, viljum það hvort eð er ekki.

 

Athugasemdir

[Jón Steinar Ragnarsson, 14.4.2011 kl. 08:42]

Og hvað kemur þetta þrætubókarlist við???  Veistu ekki hvað orðið stendur fyrir?

[Flosi Kristjánsson, 14.4.2011 kl. 10:41]

Ætli séu ekki fleiri en ég sem létu svona umfjöllun hafa áhrif á sig? 

http://youtu.be/z-oIMJMGd1Q

Hvort sem maður talar um óreiðufólk eða bara stjórnendur loftbólufjármálakerfis, þá er klárt að ekki er endalaust hægt að ganga í buddu almennra skattgreiðenda til að halda leiknum áfram.

[Ómar Bjarki Kristjánsson, 14.4.2011 kl. 19:53]

,,þá er klárt að ekki er endalaust hægt að ganga í buddu almennra skattgreiðenda til að halda leiknum áfram"

Ef að fólk ætlaði að kjósa um það - þá hefði það átt að velja sér annað efni til að tjá þá skoðun en samræmda lágmarks neytendavernd á EES svæðinu.

[Jón Atli Kristjánsson, 14.4.2011 kl. 22:05]

Sæll Flosi stórhlaupari gaman að heyra frá þér.  Kíkti á linkinn sem þú vísar til, tær snilld. Auðvitað er allt rétt sem þú segir. Þakka öðrum fyrir innlitið.

[Flosi Kristjánsson, 14.4.2011 kl. 22:13]

Umfjöllun þeirra Jónanna um fjármálakerfið er ýkt og útúrsnúin, en ekki al-vitlaus!