Orð eru beitt vopn:

Þeir sem lífsreyndari eru vita að orð eru beitt vopn. Vanhugsuð orð sem t.d. voru sögð við mann í æsku sitja þarna eins og sár, deilur í hjónaböndum eða samböndum valda skaða sem erfitt er að bæta. Oft er þetta gert í reiði, vanhugsað, og mögulega ekki meint, en orðin standa þarna.

Hvers vegna fara þá margir svona óvarlega með orð og skoðanir sínar á mönnum og málefnum.  Allir sem eru í opinberu starfi, eiga að hafa þykkan skráp er sagt og þess vegna get ég látið svona.  Já vonandi en ég held að þessar opinberu persónur séu nú bara menn eins og við hin, með tilfinningar, fjölskyldu sem ekki hefur þykkan skráp, hvað vitum við.

Í samskiptum manna eru orð myndbirting þess sem  þeir hugsa. Í mínum daglegu samskiptum og lífi er ég alltaf að fá einhver skilaboð um mig og mína hegðan.  Ef ég heyri aldrei annað en skammir, er ég niður brotinn, og það sem verra er ég fæ aldrei skilaboð um það hvað ég ætti að gera öðruvísi. 

Vöndum það sem við segjum, því orð geta meitt ekki síður enn líkamlega barsmíðar.  Vöndum það sem við segjum, því ýmsir geta heyrt það sem við segjum, og misskilið það, eins og blessuð börnin.

Svo margir eru reiðir, og þurfa að losna við þessa reiði. 

10 - leiðir,  í reiðistjórnun:

1. Taktu þér tíma, að telja upp á 10 sefar reiðina,

2. Skapaður þér rými, hættu að rífast, þar til reiðin sefast,

3. Þegar þú róast, sýndu þá reiði þína, en á uppbyggilegan hátt,

4. Hreyfðu þig, góð ganga, hlaup róar þig,

5. Hugsaður þig vel um, áður enn þú segir nokkuð við þann sem þú ert reiður útí, skrifaður hjá þér það sem þú vilt segja,

6. Finndu lausn á vandamálinu, sem kom deilum á stað. Reyndu að vinna með þeim sem þú ert reiður,

7. Notaðu ég þegar þú lýsir vandamálinu, í stað þess að ásaka hinn aðilann,

8. Reyndu að fyrirgefa, þeim sem þú reiðist, það hjálpar báðum.

9. Notaður húmor til að losa spennu, milli aðila.

10. Æfðu þig í slökun.

Athugasemdir

[Hörður Þórðarson, 29.3.2011 kl. 10:22]

Gott blogg. 

11. Stundaðu hugleiðslu. (Ef okkur finnst eitthvað vont vera að koma utan frá getur okkur skilist að í raun og veru liggja upptökin í okkur sjálfum. Það eru miklu minni skil milli þess sem okkur finnst vera fyrir utan okkur og það sem er fyrir innan. Allt sem við skynjum á upptök sín í okkar eigin huga). 

12. Finndu eitthvað gott við hinn aðilann og hrósaðu honum/henni fyrir það.

[Sigurður Þorsteinsson, 29.3.2011 kl. 22:14]

Já afar gott blogg. Viðbætur Harðar eru góð viðbót. Hér er komið tilefni til að skrifa bók. Prenta þetta út og kem fyrir á áberandi stað.

[Jón Atli Kristjánsson, 30.3.2011 kl. 08:32]

Takk Hörður og Siggi. Hef mikinn áhuga fyrir hugleiðslu og hef verið að reyna. Þekki svona grundvallaratriði og er ákveðinn í að gera betur.  Veit um marga sem hafa ótrúlegt gagn af hugleiðslu.