Fótkuldi í skammdeginu.

Í því kuldakasti sem gengið hefur yfir hef ég þjáðst af miklum fótkulda. Er annars með líkamshita eins og góður miðstöðvarofn.

Hef á þessum dögum fengið líf í lappirnar á því að fara í góða sturtu þegar ég kem heim. Er reyndar svo óheppinn að ofninn á skrifstofunni minni, hitna aðeins að hluta ( 50% ).  Skrifstofan er í gömlu og virðulegu húsi í Vesturbænum í Reykjavík, og ofninn frá sama tíma eða 1940-1950.

Ég hef hitt heimilislækninn minn, farið í blóðprufu, sem læknirinn rýnir væntanlega í þessa dagana. Get ekki látið það um mig spyrjast að ég leiti ekki allra ráða.

Í þessum hremmingum mínum hefur mér æ oftar verið hugsað til allra fótanuddtækjanna, sem keypt voru hér um árið, og fylltu lengi geymslur landsmanna.  Veit reyndar að ég get keypt svona tæki í Góða hirðinum. Þau voru blá ef ég man rétt og svo sem engin stofuprýði

Það sem hefur bjargað mér í vinnunni er að konan prjónaði á mig öfluga ullarsokka, sem ná upp á hné, hinir bestu gripir.

Nú er ég sjálfsagt einn um þetta vandamál og elli kerling hefur einfaldlega náð á mér taki.

Það er á svona stundum þegar kuldi og kröm þjáir þig sem maður fellur í dagdrauma:

• Gaman væri að eiga hús á Flórída eða Spáni,
• Að hafa efni á alvöru fríi á Kanaríeyjum, svona 1-2 mánuði á kaldasta tíma,
• Sigling í Karabíska hafinu, eða ferð til Taílands,
• Vinna í happdrætti til að fjármagna alla draumana.

Auðvitað eru allar þessar „ bestu „ lausnir handan við hornið. Ég held ég verði nú samt að skoða það að líta við í Góða hirðinum, þessi fótanuddtæki virka vonandi enn, þó þau séu forljót.

Athugasemdir

[Sigurbjörg Eiríksdóttir, 17.1.2011 kl. 12:39]

Gott hjá þér að leita allra leiða....Já auðvitað væri gott að geta eytt þessum kalda og dimma tíma í sól:)

[Jón Atli Kristjánsson, 18.1.2011 kl. 11:13]

Takk fyrir hugulsemina.  Meðan Siggi vinur okkar leysir formannamál stjórnmálaflokka og fellir palladóma um menn, þá er mitt blogg, augljóslega á lægra plani !  Það geta ekki allir leyst vandamál heimsins.

[Kolbrún Vala Jónsdóttir, 22.1.2011 kl. 11:52]

Ég mana þig til að finna svona fótanuddtæki pabbi.  Eg held að það sé algjör snilld nú setjum við af stað átakið "fótanuddtæki handa pabba"