Hressileg ganga allra meina bót.

Okkur var um daginn gefin bókin, 25 gönguleiðir um höfuðbogasvæðið eftir Reyni Ingibergsson.

Eins og nafn bókarinnar segir er þetta 25 lýsingar á gönguleiðum. Kort af leiðinni, myndir af svæðinu og ýmsar upplýsingar, t.d. um áætlaða lengd göngunnar.  Mæli eindregið með þessari bók fyrir útivistarfólk.

Bylting hefur orðið á höfuðborgarsvæðinu er varðar göngu og hjólreiðastíga. Auk göngufólks eru hlauparar einnig á ferð á þessum leiðum.

Á góðum degi eru vinsælar gönguleiðir, eins fjölfarnar og Laugavegurinn. Yfirleitt eru bekkir á leiðunum og á betri stöðum vatnspóstar.

Þú kynnist fyrst borginni eða bænum þínum þegar þú ferð að ganga, hlaupa eða hjóla um svæðið. Það er svo margt dásamlegt sem fyrir mann kemur á þessum ferðum:

• Gróðurilmurinn, sérstaklega á vorin,
• Manna og dýralíf,
• Matarlykt, ef þú er á ferð á þeim tíma, getur þú fundið það á lyktinni hvað er í matinn.

Þeir sem stunda útivist að staðaldri vita að veður skiptir ekki máli. Aðeins spurning um að klæða sig rétt.  Í dag er fáanlegur stórkostlegur búnaður, þannig að þú ert eins og inni í húsi.  Hvað er líka frísklegra en að fá á sig dálítið rok og rigningu, alvöru menn láta það tefja för.

Í bókinni góðu um gönguleiðir er leið  nr.19,  " ofan Árbæjarstíflu ". Uppáhaldsleið konunnar og sú leið sem við förum oftast.  Ég er að tuða um að fara aðrar leiðir og nýta bókina, en leið 19 verður mjög oft fyrir valinu.

Þessi hringur í Elliðaárdalnum er þannig að maður laðast að þessu svæði og reyndar dalnum öllum. Gróður er í dag ótrúlega mikill í dalnum og áin niðar við hliðina á manni.

Nafnið á dalnum er komið frá skipi landnámsmannsins Ketilbjarnar, en skip hans hét Elliði.  Í ánni ofan Árbæjarstíflu er hólmi í ánni kallaður Blásteinshólmi. Á sumrin grasi vaxinn og fyrr á tímum beittu bændur fé sínu í hólmann.

Í Elliðaánum er góð laxveiði og á sumrin þenja veiðimenn sig á bökkunum.  1917 veiddi Ólafur Thors 34 laxa á einum degi. 

Athugasemdir

[Sigurður Þorsteinsson, 7.1.2011 kl. 20:53]

Enn ein snilldargreinin hjá þér Jón. Þegar við náum 40 ára aldrinum, verðum við að hreyfa okkur a.m.k. þrisvar í viku. Æskilegast er að ganga í um eða yfir 30 mínútur og að fá púslinn aðeins upp þ.e. yfir 120 slög á mínútu. Göngustafirnir eru t.d. frábærir. Þá fer blóðrásarkerfið í gang og samkvæmt rannsóknum er það einstaklega hollt bæði fyrir líkama og sál.