Mæti keikur í ræktina.

Ég stunda reglulega líkamsrækt, eða 3-4 sinnum í viku. Hef gert þetta alla ævi. Mér finnst gaman að þessu, enginn rekur mig í ræktina, ég geri þetta af fúsum og frjálsum vilja. Þegar ég mæti í stöðina er ég alveg klár á því að ég er elsti maðurinn í stöðinni allir eru svo ungir og fallegir. Ekki það að ég sé ekki ánægður með sjálfan mig, því ég er býsna flottur m.v. aldur og fyrri störf, nei það er alveg á hreinu að fjöldinn er miklu yngri en ég.

Ég er í reynd mjög stoltur af þessu unga fólki, það leggur mikið á sig við að halda sér í formi, það er frjálslegt og glatt og enginn amast við mér kallinum. Ég held næstum því að það hafi gaman af þessu brölti í mér og mér finnst ég vera einn af hópnum. Ég æfi stundum með krökkunum mínum og þau segja mér af því að kunningjar þeirra segi, ert þú að æfa með pabba þínum, vá, það væri nú eitthvað nýtt ef pabbi minn kæmi með mér. Þetta kitlar að sjálfsögðu mína hégómagirnd, ég í ræktinni, á meðan aðrir liggja í sófanum.

Reyndar held ég að þetta sé allt að breytast, aukin hreyfing á vaxandi fylgi að fagna, aðeins að finna það form sem manni hentar. Gönguferðir, hjólreiðar, sund allt er þetta af hinu góða, aðeins að það veiti þá ánægju sem þarf til að viðhalda áhuga og ástundun. Að vera í hóp með öðrum hentar sumum vel, fá þannig stuðning og félagsskap sem marga vantar. Aðrir eru meira fyrir sig og njóta þess að vera einir með sjálfum sér.

Ég held að það sé best að borða minna en meira, og alveg örugglega allra best að borða mátulega. Að ég geri þetta að umtalsefni, er að á okkur dynur sífeldur áróður um að borða meira. Það á að koma sem mestu ofaní okkur með illu eða góðu, við erum aligæsir, matvælaframleiðenda. Flestir vita nokkurn vegin hvað er hollt og hvað er óhollt, en sannleikurinn er sá, að sálfræðihernaður söluaðila hefur náð því stigi, að eitthvað verður undan að láta. Eigum við t.d. að taka upp svipaðar merkingar á hvítum sykri, eins og á tóbaki ?

Góð heilsa er gulli betri, þegar maður er ungur, veit maður ekki hvað þetta þýðir. Sumir uppgötva þessi sannindi of seint. Hver og einn þarf því að taka ábyrgð á sjálfum sér, okkar er valið.

Athugasemdir

[Sigurður Þorsteinsson, 12.12.2010 kl. 08:54]

Hafandi hlustað á fyrirlestra Þráins Hafsteinssonar um mikilvægi reglulegar hreyfingar er mér löngu ljóst að þeir sem hreyfa sig þrisvar sinnum eða oftar eldast betur og halda sér betur í formi. Þetta á ekki síður um andlega heilsu en líkamlega. 

Nú ætla ég að taka mig á. Hef hreyft mig 2 sinnum í viku síðustu mánuðina, nú fer ég upp í 4 skipti og eftir nokkra mánuði gæti ég litið eins flottur út og þú.

[Jón Atli Kristjánsson, 14.12.2010 kl. 12:53]

Takk fyrir þessi orð. Þetta er ánægjulegt að heyra, enda komin tími áramótaheita. Á miðju næsta ári sé ég þig fyrir mér, hrikalegan og það þýði lítið að vera að abbast eitthvað upp á Sigga Þorsteins !